வெளிநாட்டு நிறுவனங்கள் எரிபொருள் விநியோகத்தைக் கட்டுப்படுத்தியுள்ளமையினால் பொதுமக்கள் மட்டுமன்றி, பல எரிபொருள் நிலையங்களும் கடும் சிரமங்களை எதிர்கொண்டுள்ளதாக எரிபொருள் நிலைய உரிமையாளர்கள் சங்கத்தின் தலைவர் குமார ராஜபக்ஷ தெரிவித்துள்ளார்.

தற்போதைய நிலைமை குறித்து விளக்கமளிக்கும் ஊடகவியலாளர் சந்திப்பிலேயே அவர் இதனைத் தெரிவித்துள்ளார்.

ஒவ்வொரு எரிபொருள் நிலையத்தையும் நடத்துவதற்கு மாதாந்த செலவு ஏற்படுவதாகவும், எரிபொருள் கிடைக்காமையினால் அவற்றை தொடர்ந்தும் நடத்துவது கடினமாகியுள்ளதாகவும் அந்த சங்கம் சுட்டிக்காட்டியுள்ளது.

இதன் காரணமாக எரிபொருள் நிலைய ஊழியர்களுக்கு வேதனம் வழங்குவதும் சிக்கலாகியுள்ளதால், நிலவும் பிரச்சினைக்கு விரைவாக தீர்வு வழங்குமாறு எரிபொருள் நிலைய உரிமையாளர்கள் சங்கம் அரசாங்கத்திடம் கோரிக்கை விடுத்துள்ளது.

இதேவேளை, மத்திய கிழக்கு பிராந்தியத்தில் ஏற்பட்டுள்ள பதற்ற நிலைமைகள் மற்றும் போர்கள் காரணமாக உலக சந்தையில் மசகு எண்ணெய் மற்றும் சுத்திகரிக்கப்பட்ட எரிபொருட்களின் விலைகள் கடுமையாக உயர்ந்துள்ளன.

இதனால் உலகளாவிய ரீதியில் கப்பல் கட்டணங்கள் மற்றும் கடல்சார் காப்பீட்டுக் கட்டணங்கள் (shipping costs) அதிகரித்துள்ளன.

சர்வதேச சந்தையில் அதிக விலைக்கு எரிபொருளைக் கொள்முதல் செய்து, உள்நாட்டில் நிர்ணயிக்கப்பட்டுள்ள குறைந்த விலைக்கு விற்பனை செய்வதால், தனியார் வெளிநாட்டு எரிபொருள் விநியோக நிறுவனங்களுக்கு ஒரு லீற்றர் டீசலுக்கு சுமார் 170 ரூபாய் வரை நஷ்டம் ஏற்படுவதாகத் தெரிவிக்கப்படுகிறது.

எனவே தாங்கள் சந்திக்கும் நிதி இழப்பைக் குறைப்பதற்காக, செலவுக்கு ஏற்ற வகையில் எரிபொருள் விலையை மாற்றியமைக்க கோரி, அரசாங்கத்தின் முடிவு வரும் வரை எரிபொருள் விநியோகத்தை அந்த நிறுவனங்கள் கட்டுப்படுத்தியுள்ளதாக அறிய முடிகிறது.