අම්බලන්ගොඩ ව්‍යාපාරිකයා ඝාතනය කළේ කවුද ?

අම්බලන්ගොඩ ප්‍රදේශයේ ප්‍රකට ව්‍යාපාරිකයෙකු මෙන්ම ගාල්ල දිස්ත්‍රික් ක්‍රිකට් සංගමයේ සභාපති ප්‍රේමසිරි හැලඹගේ ඊයේ (12) රාත්‍රියේ වෙඩි තබා ඝාතනය කර තිබුණා.

සුදු පැහැති මෝටර් රථයකින් පැමිණි පුද්ගලයින් දෙදෙනෙක් අම්බලන්ගොඩ - මානිමුල්ල ප්‍රදේශයේ ඔහුගේ නිවස අසලදී මෙම වෙඩි තැබීම සිදුකර පලා ගොස් ඇති බවටයි පොලීසිය ප්‍රකාශ කළේ.

වෙඩි වැදීමෙන් බරපතල තුවාල ලැබූ ප්‍රේමසිරි හැලඹගේ බලපිටිය මූලික රෝහලට ඇතුලත් කරන අවස්ථාවේදී ජීවිතක්ෂයට පත්ව සිටි බවටයි වාර්තාවන්නේ.

එහිදී තුවාල ලැබූ ඔහුගේ 12 හැවිරිදි පුත්‍රයාද බලපිටිය මූලික රෝහලේ ප්‍රතිකාර ලබනවා.

ඝාතනයට ලක්වූ ප්‍රේමසිරි හැලඹගේ මහතා ශ්‍රී ලංකා  ඒ කණ්ඩායම නියෝජනය කළ ක්‍රිකට් ක්‍රීඩකයෙක්.

මෙම වෙඩි තැබීම සඳහා ටී 56 සහ මිලිමීටර් 9 වර්ගයේ ගිනි අවි දෙකක් යොදාගෙන ඇති බවටයි සිදුකළ පරීක්ෂණවලදී අනාවරණ වී ඇත්තේ.

වෙඩි තැබීමට හේතුව හෝ  වෙඩි තැබූ පුද්ගලයින් කවුරුන්ද යන්න මෙතෙන් අනාවරණ වී නොමැති බවටයි පොලීසිය වැඩිදුරටත් ප්‍රකාශ කළේ.

53 හැවිරිදි වියේ පසුවන ප්‍රේමසිරි හැළඹගේ පසුගිය 28 වනදා පැවති නිලවරණයේ ගාල්ල දිස්ත්‍රික් ක්‍රිකට් සංගමයේ සභාපති ධුරයට පත්වුණා.

එම නිලවරණය පැවැත්වූයේ ගැටළුකාරී තත්ත්වයක් මධ්‍යයේ බවටයි වැඩිදුරටත් වාර්තා වන්නේ.

අදාළ නිලවරණය පැවැත්වීම සඳහා සංගමයේ සාමාජිකයින් ගාල්ල ජාත්‍යන්තර ක්‍රිකට් ක්‍රීඩාංගනයට පැමිණියත් ඔවුන්ට එම පරිශ්‍රයට ඇතුලූවීමට හැකියාවක් ලැබී තිබුණේ නැහැ.

ඒ, පාලනාධිකාරිය එහි ගේට්ටුව වසා තැබීම හේතුවෙන්. අවසානයේදී පැමිණි පිරිස ගේට්ටුව ඉදිරිපිට රැස්වීම පවත්වා නව නිලධාරී මණ්ඩලය පත්කරගැනීමට කටයුතු කරනු ලැබුවා.

කෙසේ වෙතත් ප්‍රේමසිරි හැලඹගේගේ සභාපති ධුරය ශ්‍රී ලංකා ක්‍රිකට් ආයතනය පිළිගත්තේ නැහැ. එම ආයතනය ලිපියක් මගින් සඳහන් කර තිබුණේ එම නිලවරණය නැවත මේ මස 27 වනදා පැවැත්විය යුතු බවයි.

ක්‍රිකට් ආයතනයේ තීරණයට එරෙහිව අධිකරණයට ගිය ප්‍රේමසිරි, එම නිලවරණයට වාරණ නියෝගයක් ලබාදෙන ලෙස ඉල්ලීමක් කර තිබුණා.

ඒ අනුව අගෝස්තු 27 වනදා පැවැත්වීමට නියමිත ගාල්ල දිස්ත්‍රික් ක්‍රිකට් සංගම් නිලවරණය අත්හිටුවමින් ගාල්ල දිසා අධිකරණය වාරණ නියෝගයක් නිකුත් කර තිබුණා.

ඒ, ප්‍රේමසිරි හැලඹගේ ඝාතනය වීමට දින 03 කට ඉහතදීයි.