නිරෝධායන ඇඳිරි නීති සමයේ වූවත් රිය අනතුරුවලට රක්ෂණ වන්දි සහතිකයි

නිරෝධායන නීති ඇඳිරි නීතිය ක්‍රියාත්මක කාල සීමාවේදී මාර්ගවල ධාවනය වන වාහන යම් අනතුරකට ලක්වුවහොත් ඊට අදාළ රක්ෂණ වන්දි ලබාගත හැක්කේ නිසි අවසරය මත ධාවනය වන වාහනවලට පමණක් බවට පළවන වාර්තා සත්‍යයෙන් තොර බව ශ්‍රී ලංකා රක්ෂණ නියාමන කොමිෂන් සභාව පවසනවා.

එහි උසස් නිලධාරියෙකු හිරු ප්‍රවෘත්ති අංශයට කියා සිටියේ රක්ෂණ වන්දි ලබාගැනීමට සෑම වාහන හිමිකරුවෙකුටම අයිතියක් පවතින බවයි.

මීට අදාළව ශ්‍රී ලංකා රක්ෂණ සම්මේලනය එකඟතාව පළ කර ඇතැයිද රක්ෂණ නියාමන කොමිෂන් සභාව පෙන්වා දුන්නා.

ශ්‍රී ලංකා රක්ෂණ සම්මේලනයද මේ සම්බන්ධයෙන් නිවේදනයක් නිකුත් කර ඇති අතර, එහි දැක්වෙන්නේ නිරෝධායන ඇඳිරි නීති සමයේ සිදුවන රිය අනතුරුවලදී රක්ෂණ වන්දි මුදල් හිමි නොවන බවට සමාජ මාධ්‍යවල සංසරණය වන වාර්තා පිළිබඳව තමන් දැනුවත් බවයි.

එමෙන්ම, තම සම්මේලනය හෝ රක්ෂණ නියාමනය මගින් රක්ෂණ සමාගම්වලට එවැනි දැනුම්දීමක් සිදුකර නොමැති අතර, නිරෝධායන ඇඳිරි නීති සමයේ සිදුවන අනතුරුවලදී රක්ෂණ හානිය ඇගයීම සහ ගෙවීම් සිදුකිරීමට කටයුතු කරන බවද අවධාරණය කරනවා.