සිරිපා වන්දනා නඩයක් රැගත් බස් රථයක් පෙරළෙයි - දෙදෙනෙකු මරුට (වීඩියෝ)

UPDATE: 2023-02-20 | 08:34 am

ශ්‍රී පාද වන්දනාකරුවන් රැගත් පෞද්ගලික බස් රථයක් නෝට්න්බ්‍රිජ් - දියගල ප්‍රධාන මාර්ගයේ හුළංවංගුව නැමති ස්ථානයේදී මාර්ගයෙන් ඉවතට පැන අඩි 225 ක පමණ ප්‍රපාතයකට පෙරළීමෙන් කාන්තාවන් දෙදෙනෙකු මියගොස් 26 දෙනෙකු තුවාල ලැබුවා.

සිද්ධියෙන් මියගිය කාන්තාවන් දෙදෙනා අවුරුදු 30 සහ 20 යන වයස්වල පසුවන තෙලිජ්ජවිල සහ බණ්ඩාරවෙල ප්‍රදේශවල පදිංචිකරුවන්.

ඊයේ රාත්‍රී 9.15 ට පමණ මෙම අනතුර සිදුව තිබෙනවා.

ප්‍රදේශවාසීන් නෝට්න්බි්‍රජ් පොලිසියේ නිලධාරීන් සහ යුද හමුදා සෙබළුන් එක්ව මහත් පරිශ්‍රමයක් දරා තුවාලකරුවන් ප්‍රධාන මාර්ගයට ගෙනවිත් නාවලපිටිය - ගිනිගත්හේන සහ වටවල යන රෝහල් වෙත රැගෙන ගිය බවයි පොලිසිය සඳහන් කළේ.

පොලිස් මාධ්‍ය ප්‍රකාශක කොට්ඨාසය සඳහන් කළේ තුවාල ලැබූවන්ගෙන් 23 දෙනෙකු නාවලපිටිය රෝහලේත්, එක් අයෙකු බැගින් මහනුවර සහ පේරාදෙණිය රෝහල්වල ප්‍රතිකාර ලබන බවයි.

මොවුන් අතර බස් රථයේ රියදුරු සහ රිය සහයක ද ඇතුලුව කාන්තාවන් 14 දෙනෙකු සහ පිරිමි පුද්ගලයින් 11 දෙනෙකු සිටින බවයි පොලිස් මාධ්‍ය කොට්ඨාසය සඳහන් කළේ.

මහරගම ප්‍රදේශයේ සිට ශ්‍රීපාද වන්දනාකරුවන් රැගෙන පැමිණ ඇති මෙම බස් රථය වන්දනාව නිම කර ආපසු ගම් බිම් බලා යමින් සිටියදීි මෙලෙස අනතුරට ලක්ව තිබුණා.

පටු වංගු සහ අධික බෑවුම් සහිත නෝට්න්බ්‍රිජ් දියගල ප්‍රධාන මාර්ගයේදී සිදුව ඇති මෙම අනතුර සම්බන්ධයෙන් නෝට්න්බ්‍රිජ් පොලිසිය වැඩිදුර විමර්ශන සිදුකරනවා.
----------------

සිරිපා වන්දනාවේ ගොස් පැමිණෙමින් තිබූ බස් රථයක් ප්‍රපාතයකට පෙරළී අනතුරක් සිදුව ඇති බව වාර්තා වනවා.

නෝට්න් බ්‍රිජ් පොලිස් වසමේ ටැප්ලෝ නම් ප්‍රදේශයේ දී මෙම අනතුර සිදුව ඇති අතර අනතුර හේතුවෙන් වන්දනාකරුවන්ට ජීවිත හානි සිදුව ඇතැයි තවමත් වාර්තා වන්නේ නැහැ.

බස් රථය අඩි 100ක පමණ ප්‍රපාතයකට පෙරළී ඇති බවයි හිරු ප්‍රවෘත්ති වාර්තාකරුවන් ප්‍රකාශ කළේ.

කෙසේ නමුත් මේ වබ විට තුවාලකරුවන් 30ක් පමණ නාවලපිටිය, වටවල යන රෝහල්වලට ඇතුලත් කර තිබෙනවා.

තුවාල ලැබූ ලැබූ වන්දනාකරුවන් ව නෝටන් බ්‍රිජ් පොලිසිය ප්‍රදේශවාසින්ගේ සහාය ඇතිව රෝහල් ගත කරමින් පවතිනවා.