සුළි කුණාටුවක් ගැන අනතුරු ඇඟවීමක්

ගිණිකොණ දිග බෙංගාල බොක්ක ආශ්‍රිතව පවතින අඩු පීඩන කලාපය මේ වන විට පීඩන අවපාතයක් දක්වා වර්ධනය වී තිබෙනවා.

ආපදා කළමනාකරන මධ්‍යස්ථානය නිවේදනය කළේ මෙම තත්ත්වය සුළි කුණාටුවක් දක්වා වර්ධනය වෙමින් පවතින බවයි.

ඒ අනුව ඉදිරි පැය 12 තුළ මෙම තත්ත්වය පීඩන අවපාතයක් දක්වාත් දෙසැබර් 03 වන දින වන විට සුළි කුණාටුවක් දක්වාත් තවදුරටත් වර්ධනය වනු ඇති බවයි වාර්තා වන්නේ.

ඒ හේතුවෙන් අද පස්වරුවේ සිට වර්ෂාපතනයේ වැඩි වීමක් අපේක්ෂා කරන බව එම මධ්‍යස්ථානය වැඩිදුරටත් සඳහන් කරනවා.

උතුරු, උතුර - මැද,නැගෙනහිර සහ වයඹ පළාත්වල විිටින් විට වැසි හෝ ගිගුරුම් සහිත වැසි ඇතිවන අතර ඇතැම් ස්ථානවලට මිලි.මීටර 1000 ඉක්ම වූ තද වැසි ද ඇති විය හැකි බව ද සඳහන්.

කෙසේ වෙතත් අප කළ විමසීමක දී ආපදා කළමණාකරන මධ්‍යස්ථානයේ නියෝජ්‍ය අධ්‍යක්ෂක ප්‍රදීප් කොඩිප්පිලි පැවසුවේ මෙම සුළි කුණාටු තත්ත්වය හේතුවෙන් මෙරටට බරපතළ අවදානමක් නොමැති බවයි.