එළවළු මිලෙහි දැවැන්ත වෙනසක්

මීට මාස කිහිපයකට ඉහතදී කිලෝවක් රුපියල් දහසක් තරම් ඉහළ ගිය කැරට් තොග මිල රුපියල් 240 දක්වා අඩුවී ඇති බව එළවළු වෙළෙඳුන් පවසනවා.

මේ අතර දඹුල්ල ආර්ථික මධ්‍යස්ථනය සහ පෑලියගොඩ මැනිං වෙළෙඳපොළ ඇතුළු ආර්ථික මධ්‍යස්ථාන රැසකට එළවළු තොග වැඩි වශයෙන් ලැබීම හේතුවෙන් එළවලු මිල සැළකිය යුතු ප්‍රමාණයකින් පහත ගොස් ඇති බවයි හිරු ප්‍රවෘත්ති කළ සොයා බැලීමකදී අනාවරණ වුණේ.

පසුගිය දිනවල රුපියල් 350කට අලෙවි වූ රතු ළුෑනු කිලෝවක මිල රුපියල් 110 දක්වා පහත වැටී ඇති අතර වෙළෙඳුන් අතරමැදි වෙළෙඳුන්ගෙන් ඉල්ලා සිටින්නේ එළවළු මිල අඩුවීමේ වාසිය ජනතාවට උපරිමයෙන් ලබාදෙන ලෙසයි.

මේ අතර පෑලියගොඩ මැනිං වෙළෙඳපොළේ කැරට් කිලෝවක මිල රුපියල් 200ක් හා , බෝංචි කිලෝවක් රුපියල් 160කටත් ලීක්ස් කිලෝවක් රුපියල් 150ත් අතර මිලකටත් පැවතියා.

නාරාහේන්පිට ආර්ථික මධ්‍යස්ථානයේ කැරට් කිලෝවක සිල්ලර මිල දැක්වුණේ රුපියල් 240ත් ලෙසයි .

බෝංචි කිලෝවක් රුපියල් 240කටත් , ලීක්ස් කිලෝවක් රුපියල් 320කට සහ අමු මිරිස් කිලෝවක මිල රුපියල් 600ක් ලෙසද දැක්වුණා

මේ අතර අද වනවිට වෙළෙඳ පොළේ ඉන්දියාවෙන් ගෙන්වූ බිත්තරවල මිලටත් වඩා දේශීය බිත්තර මිල අඩුවී ඇති බව සමස්ත ලංකා බිත්තර නිෂ්පාදකයින්ගේ සංගමය පවසනවා.

සීමාවකින් තොරව සතොස හරහා ඉන්දියානු බිත්තරයක් රුපියල් 43ක මිලකට අලෙවි වන පසුබිමක ඇතැම් වෙළෙඳ සැල්වල දේශීය බිත්තරයක මිල රුපියල් 40ත් 50ත් අතර අගයක පවති බවයි හිරු කළ සොයා බැලීමකදී හෙළි වුණේ.