මන්නාරම අධිකරණය ඉදිරිපිට සිදුවූ වෙඩි තැබීමෙන් දෙදෙනෙකු ජීවිතක්ෂයට(වීඩියෝ)

UPDATE - මන්නාරම අධිකරණය ඉදිරිපිට සිදු වූ වෙඩි තැබීමකින් පුද්ගලයින් 04 දෙනෙකු තුවාල ලබා තිබෙනවා.

තුවාල ලැබුවන් රෝහලට ඇතුළත් කිරීමේදී ඉන් දෙදෙනෙකු මිය ගොස් ඇති බවයි මන්නාරම දිස්ත්‍රික් රෝහල් අධ්‍යක්‌ෂවරයා පවසන්නේ.

තුවාල ලැබු අනෙක් දෙදෙනා අතර සිටි පිරිමි පුද්ගලයා වැඩිදුර ප්‍රතිකාර සඳහා යාපනය ශික්ෂණ රෝහල වෙත මාරුකර යැවුණා.

පොලිසිය පැවසුවේ වෙඩික්කරුවන් එම පිරිමි පුද්ගලයින් ඉලක්ක කර වෙඩි තබා ඇති බවට සැකකරන බවයි.

තුවාල ලැබු කාන්තාව අධිකරණයේ පැවති නඩු විභාගයක් සඳහා පැමිණි වෙනත් කාන්තාවක් බවටයි හඳුනාගෙන ඇත්තේ .

----------------

මන්නාරම මහේස්ත්‍රාත් අධිකරණය ඉදිරිපිට දී යතුරු පැදියකින් පැමිණි දෙදෙනෙකු අද (16) උදෑසන සිදු කළ වෙඩි තැබීමකින් පුද්ගලයින් තුන්දෙනෙකු තුවාල ලබා තිබෙනවා.

තුවාල ලැබූවන් නඩු කටයුත්තක් සදහා අධිකරණ භූමියට පැමිණි අය බවට අනාවරණය වී ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි බුද්ධික මනතුංග ප්‍රකාශ කළා.

ස්කූටි වර්ගයේ යතුරු පැදියකින් පැමිණි දෙදෙනෙක් පිස්තෝල වර්ගයේ ගිනි අවියකින් වෙඩි තබා පළා ගොස් තිබු බව පොලිසිය සඳහන් කළා.

අද පැවැත්වෙන නඩු විභාගයක් සඳහා පැමිණ සිටි පුද්ගලයින් තිදෙනෙක් සහ කාන්තාවක් මෙම වෙඩි ප්‍රහාරයට ලක්ව තිබු අතර, වෙඩි වැදීමෙන් තුවාල ලැබු ඔවුන් ප්‍රතිකාර සඳහා මන්නාරම දිස්ත්‍රික් මහ රෝහලට ඇතුළත් කෙරුණා.