දියණියගේ චිත්‍රයෙන් හෙළිවූ මවගේ ඝාතන අබිරහස

ඉන්දියාවේ උත්තර් ප්‍රදේශ්හි ජාන්සිහි පිහිටි නිවසක කාන්තාවක් මියගොස් සිටියදී ඊයේ (17) සොයාගෙන තිබෙන බව විදෙස් මාධ්‍ය වාර්තා කරනවා.

මෙසේ මියගොස් ඇත්තේ, 27 හැවිරිදි සොනාලි බුදෝලියා නමැති එක්දරු මවක්.

කෙසේ වෙතත්, මෙම මරණය සියදිවි නසාගැනීමක් ලෙස පෙන්වීමට සලස්වා ඇති නමුත්, ඇයගේ සිව් හැවිරිදි දියණිය ඇඳි චිත්‍රයක් නිසා පරීක්ෂණ කටයුතු වෙනත් මාවතකට යොමු වූ බවටයි මාධ්‍ය වාර්තා සඳහන් කරන්නේ.

මරණය සම්බන්ධයෙන් දියණිය පවසා තිබෙන්නේ, ඇයගේ පියා මවට පහර දී මරා දමා පසුව සිරුර එල්ලූ බවයි.

"තාත්තා අම්මට පහර දීලා මරලා දැම්මා. ඊට පස්සේ එයා කිව්වා 'ඔයාට ඕන නම් මැරෙන්න' කියලා. එයා අම්මගේ ඇඟ එල්ලලා ඔලුවට ගලකින් ගැහුවා. පස්සේ, එයා ඒ සිරුර බිමට ගෙනල්ලා ගෝනියකට දැම්මා," යනුවෙන් ඇය පවසා තිබුණා.

තවද, සිය පියා මීට පෙර මව මරා දමන බවට තර්ජනය කළ බවට ද දියණිය එහිදී පවසා තිබෙනවා.

මධ්‍ය ප්‍රදේශ්හි ටිකම්ගාර් දිස්ත්‍රික්කයේ පදිංචිකරුවෙකු වන සොනාලිගේ පියා සංජීව් ත්‍රිපාති පැවසුවේ, ඔහුගේ දියණිය සහ බෑනාවන සන්දීප් බුදෝලියා 2019 වසරේ දී විවාහ වූ නමුත් ඔවුන්ගේ විවාහ ජීවිතය ගැටළු සහගත වූ බවයි.

කෙසේ වෙතත්, සොනාලි ගැහැණු දරුවෙකු බිහි කළ පසු තත්ත්වය තවත් නරක අතට හැරුණු බවයි සංජීව් පවසා ඇත්තේ.

"සන්දීප්ට පිරිමි ළමයෙක් අවශ්‍ය වුණා. දරු ප්‍රසූතියෙන් පසු, ඔහු සහ ඔහුගේ පවුලේ අය මගේ දුව රෝහලේ තනි කළා. ගෙවීම සම්පූර්ණ කිරීමට මට සිදු වුණා. මම ඇයව ගෙදර ගෙන ගියා. සොනාලි සහ දරුවාව පිළිගැනීමට මාසයකට පසුයි සන්දීප් ආවේ," යනුවෙන් පියා සඳහන් කළා.

කෙසේ වෙතත්, කොට්වාලි නගර පොලිසිය සඳහන් කර ඇත්තේ, මළ සිරුර මරණ පරීක්ෂණය සඳහා යවා ඇති බවත් වාර්තාව බලාපොරොත්තුවෙන් සිටින බවත්.