"අපි 150ට වී ගත්තොත් මෝල්හිමියෝ හාල් මිල වැඩි කරනවා" - ඇමති ලාල්කාන්ත

වී අලෙවි මණ්ඩලයෙන් රුපියල් 150ට වී ලබාගතහොත් සහල් මිල ඉහළ දැමීමට මෝල්හිමියන් බලා සිටින බව කෘෂි අමාත්‍ය ලාල්කාන්ත පවසනවා.

අද (24) පාර්ලිමේන්තුවේදී අමාත්‍යවරයා සඳහන් කළේ, ගොවියාගෙන් ඉහළ මිලකට වී මිලදී ගැනීමේ ගැටළුවක් මතුව ඇති බවයි.

එහිදී වැඩිදුරටත් අදහස් දැක්වූ අමාත්‍යවරයා,

"වී අලෙවි මණ්ඩලයෙන් වී මිලදී ගන්න මිල ඉහළ දමනවාද? නැත්නම් ඒ අයට වෙන සහනයක් ලබාදෙන ක්‍රමයක් හදනවාද? කියන එක පිළිබඳ ගැටළුවක් තියෙනවා.

වී මිල 150ට විතර ගෙනගියොත් මෝල්හිමියෝ සහල් මිල වැඩි කරන්න බලාගෙන ඉන්නවා. එතකොට පොදුවේ පාරිභෝගිකයින්ට ගැටළුවක් මතුවෙනවා. එහෙම ප්‍රශ්නයක් තියෙනවා. පිරිවැයට සරිලන අගයක් ගොවියාට ගෙවන්න ඕනි කියන ප්‍රතිපත්තියෙන් අපි වැඩ කරගෙන යනවා. ඒ අනුව ඉදිරි කටයුතු කරනවා."