මත්පැන් වැටලීමට ගිය පොලිසියට බල්ලන් 8ක් මුදාහැර සපා කෑමට සලස්වලා : ස්ථානාධිපති ඇතුළු 4කට තුවාල

නීති විරෝධී මත්පැන් වැටලීමට ගිය අඟුරුවාතොට පොලිසියේ නිලධාරීන්ව බල්ලන් ලවා සපා කෑමට ඉඩ හැර සාපරාධී බලහත්කාරය පා සහ රාජකාරියට බාධා කළ යුවළක් රුපි‍යල් දෙලක්ෂ පනස් දහස බැගින් වූ ශරීර ඇප මත මුදා හරින ලෙස කළුතර වැඩ බලන මහේස්ත්‍රාත් හිමාෂ් ලියනාරච්චි ඊයේ (28) නියෝග කළා.

මෙසේ ඇප මත මුදා හැරුණේ දියගම, ගල්පාත පදිංචි 40 වියැති අයෙක් සහ ඔහුගේ බිරිඳ වන 36 හැවිරිදි තැනැත්තියක්.

කළුතර දිසාව භාර නියෝජ්‍ය පොලිස්පතිනි පද්මිනී වීරසූරියගේ උපදෙස් හා නියෝග මත අඟුරුවාතොට පොලිස් ස්ථානාධිපති පොලිස් පරීක්ෂක අසංක රාජකරුණා ප්‍රමුඛ නිලධාරීන් කණ්ඩායමක් පෙරේදා (27) දින සවස 3.30 ට පමණ මෙම නිවස වැටලීමේදී බහින්බස්වීමක් ඇතිවී පොලිස් නිලධාරීන්ගේ රාජකාරියට බාධා කර නිවසේ සිටි බල්ලන් 08 දෙනෙකු මුදා හැර පොලිස් නිලධාරීන්ව සපා කෑමට ලක් කර ඇතැයි පොලිසිය අධිකරණය හමුවේ කියා සිටියා.

බල්ලන්ගේ සපා කෑමට ලක්වූ අගුරුවාතොට පොලිස් ස්ථානාධිපති පොලිස් පරීක්ෂක අසංක රාජකරුණා සහ පොලිස් කොස්තාපල් (99625) මනෝජ් අබේකෝන් යන නිලධාරීන් කළුතර නාගොඩ ශික්ෂණ රෝහලට ඇතුළත්ව ප්‍රතිකාර ලබා පිටව ගොස් ඇති බවත්‍, පොලිස් පරික්ෂක සුධීර සහකොස්තාපල් (83935) ක්‍රිශාන්ත යන මහත්වරුන්‍ සුළු තුවාල ලබා ඇතැයිද පොලිසිය අධිකරණයට කරුණු ඉදිරිපත් කර තිබුණා.

මෙම සිද්ධියෙන් පසු අත් අඩංගුවට ගත් සැකකාර යුවළ කසිප්පු මිලි ලීටර් 1000 ක්ද සමග දකුණු කළුතර පොලිසියට භාරවී තිබුණා.

මෙහිදී දකුණු කළුතර පොලිසියේ උප පොලිස් පරික්ෂක බණ්ඩාර පැමිණිල්ල ඉදිරිපත් කළ අතර සැකකාර යුවළ වෙනුවෙන් නීතිඥ බන්දුල වීරසිංහ පෙනී සිටියා.

ඉදිරිපත් වූ කරුණු සැලකිල්ලට ගත් අධිකරණය සැකකරුවන්ට ඇප නියම කර මෙහි වැඩිදුර විභාගය ජූලි මස 10 වැනිදා තෙක් කල් තැබුණා.