ගොමවලින් හරිත බලශක්ති විප්ලවයකට මග පෑදෙයි

පෙට්‍රල් සහ ඩීසල් වැනි සම්ප්‍රදායික පොසිල ඉන්ධන වෙනුවට භාවිත කළ හැකි පුනර්ජනනීය ඉන්ධනයක් වන ‘සම්පීඩිත ජීව වායුව’ නිෂ්පාදනය සඳහා වටිනා පිරිසිදු බලශක්ති ප්‍රභවයක් ලෙස ගොම (ගව අපද්‍රව්‍ය) වේගයෙන් ඉස්මතු වෙමින් පවතිනවා.

සාමාන්‍යයෙන්, එක් ගවයෙකුගෙන් වසරකට ලැබෙන ගොම ප්‍රමාණයෙන් මෝටර් රථයක් කිලෝමීටර් 5,500කට ආසන්න දුරක් ධාවනය කිරීමට අවශ්‍ය සීබීජී (CBG) වායුව උත්පාදනය කළ හැකි බවයි බ්ලූම්බර්ග් වෙබ් අඩවිය පවසනවා.

මෙම ක්‍රියාවලියේදී සිදුවන්නේ ගව අපද්‍රව්‍ය එකතු කර, නිර්වායු ජීරණය මඟින් ඒවා ජීව වායුව බවට පත් කිරීමයි. පසුව, මෙලෙස නිපදවෙන මෙතේන් බහුල වායුව පිරිසිදු කර, සම්පීඩිත ස්වාභාවික වායුවට සමාන ගුණාංගවලින් යුත් ‘සම්පීඩිත ජීව වායුව ලෙස සකස් කිරීමයි.

මෙම වායුව වාහන ධාවනය සඳහා මෙන්ම නිවාස සහ ගම්මානවලට පිරිසිදු බලශක්තිය සැපයීමට ද යොදාගත හැකියි.

තිරසාර විකල්ප ඉන්ධනයක් සැපයීමට අමතරව, මෙම ‘සීබීජී’ නිෂ්පාදනය හරහා ප්‍රතිලාභ රැසක් අත්වෙනවා.

විශේෂයෙන්ම, ඉන්දියාව බොරතෙල් ආනයනය මත රඳා පැවතීම අවම කිරීමටත්, කෘෂිකාර්මික අපද්‍රව්‍යවලින් මුදල් ඉපයීම හරහා ගොවීන්ට අමතර ආදායම් මාර්ගයක් නිර්මාණය කිරීමටත් මෙයින් අවස්ථාව සැලසෙනවා.

එමෙන්ම හරිතාගාර වායු විමෝචනය අවම කරන මෙම ක්‍රියාවලිය, රට තුළ ක්‍රියාත්මක හරිත බලශක්ති වැඩසටහන් යටතේ වඩාත් පිරිසිදු, පුනර්ජනනීය බලශක්තියක් කරා යන ගමනට විශාල ශක්තියක් සපයයි.