නේපාලයේ ගංවතුරෙන් අතුරුදන් වූ ගණන 1500ට ආසන්න වෙයි

නේපාලයේ ජාතික ආපදා අවදානම් අවම කිරීමේ සහ කළමනාකරණ අධිකාරිය සිය නවතම තොරතුරු වාර්තා කරමින් පවසන්නේ, නේපාලයට බලපෑ ගංවතුර තත්ත්වයෙන් පසුව පුද්ගලයින් 1500කට ආසන්න ප්‍රමාණයක් අතුරුදහන් වී ඇති බවයි.

එලෙස අතුරුදහන් වී ඇති සංචාරකයින් සංඛ්‍යාව 800කට වැඩි බවයි වාර්තා වෙන්නේ.

ටිබෙට් හි ලාසා නගරය නේපාලයේ කත්මණ්ඩු අගනුවර හා සම්බන්ධ කරන, පාගමන් සංචාරකයින් සහ වන්දනාකරුවන්ගෙන් පිරීගිය කඳුකර ප්‍රදේශයක් තුළ ඊයේ (26) සිදු වූ මෙම ආපදාවෙන් පසුව, කොටුවී සිටින දහස් සංඛ්‍යාත පිරිසක් වෙනුවෙන් නේපාලයේ මුදවාගැනීමේ කණ්ඩායම් හෙලිකොප්ටර් යානා භාවිත කරමින් හදිසි සහනාධාර ලබාදීමට කටයුතු කළා.

"අපි සෙවුම් මෙහෙයුම් නැවත ආරම්භ කර ඇති අතර තවත් මළසිරුරු හමුවනු ඇතැයි බලාපොරොත්තු වන බැවින් මෙම සංඛ්‍යාව තවදුරටත් ඉහළ යනු ඇත," යැයි පොලිස් ප්‍රකාශක අබි නාරායන් කාෆ්ලේ (Abi Narayan Kafle) රොයිටර් පුවත් සේවයට පවසා සිටියා.

නේපාලයේ අතුරුදහන් වූ 826 දෙනා අතර විදේශිකයන් 500 කට ආසන්න සංඛ්‍යාවක් සිටින බවයි වාර්තා වෙන්නේ.

රටවල් විස්සකට වැඩි ගණනකින් අතුරුදහන් වී ඇති සංචාරකයින් අතර, ඉන්දියාවෙන් 177 දෙනෙකු, ඇමරිකා එක්සත් ජනපදයෙන් 63 දෙනෙකු, ඕස්ට්‍රේලියාවෙන් 34 දෙනෙකු, බ්‍රිතාන්‍යයෙන් 33 දෙනෙකු සහ කැනඩාවෙන් 25 දෙනෙකු වන බවට වාර්තා වෙනවා.

ටිබෙට් හි ගියිරොන්ග් (Gyirong) ප්‍රාන්තයේ අතුරුදහන් වූ සංඛ්‍යාව 558 ක් බවත්, ඒ අතර විදේශිකයින් 260 දෙනෙකු සිටින බවත් චීන රාජ්‍ය නාලිකාවක් වන CCTV ප්‍රකාශකර සිටියා.

"එය කෙළින්ම අප දෙසට ආ විශාල පස් සහ මඩ සහිත ජල පහරක්," යැයි නේපාල රෝහලක ප්‍රතිකාර ලබන 68 හැවිරිදි කේෂව් ප්‍රසාද් බරාල් (Keshav Prasad Baral) නමැති දිවි ගලවාගත් තැනැත්තෙක් පවසා සිටියා.

"එය ළඟා වෙත්ම තවත් ඉහළ ගියා. එය අපේ ගෙදරට ඇතුළු වනවා දැක මම මගේ බිරිඳගේ අතින් අල්ලාගෙන උඩ තට්ටුවට යාමට උත්සාහ කළා. නමුත් ඇය මඩ පස් පහරට ගසාගෙන ගියා." යනුවෙනුයි ඔහු පවසා සිටියේ.

පැය හතරකට පසු හෙලිකොප්ටර් යානයකින් ඔහුව බේරාගනු ලැබුවා.

"මගේ බිරිඳ තවමත් කොහේ හරි මඩ යට වැටී සිටිනවා. ඇය තවත් නැහැ," ඔහු වැඩිදුරටත් පවසා සිටියා.

තවත් දිවි ගලවාගත් අයෙකු පැවසුවේ ඇඹුල් අඹ ගසක එල්ලී තමා බේරුණු බවයි.

නේපාල නිලධාරීන්ගේ මුලික වාර්තාවලින් කියැවුණේ මෙම ප්‍රදේශයේ සිදුවූ භූමිකම්පාවක් හේතුවෙන් හිම කන්දක පහළ කොටස කඩාවැටී මෙම ගංවතුර හටගන්නට ඇති බවයි.

එක්සත් ජනපද භූ විද්‍යා සමීක්ෂණ ආයතනය (USGS) පැවසුවේ මුලින් රික්ටර් මාපක 4.4 ක් ලෙස වාර්තා වූ භූමිකම්පාව, සැබවින්ම හිම සහ පාෂාණ කඩාවැටීමෙන් හා පසුව සිදු වූ පස් නායයාමෙන් ඇති වූ භූ කම්පන ශක්තියක් බවයි.

චීන බලධාරීන් විසින් පස් කඩාවැටීමට සහ ගංවතුරට ලක්වූ ටිබෙට්-නේපාල දේශසීමාවට ඉහළින් පිහිටි ගියිරොන්ග් හි තවමත් අවහිර වී ඇති විලකින් මතුවිය හැකි අවදානම් හඳුනාගෙන ඇති අතර, එය මෙම කඳුකර භූමියේ මුදවාගැනීමේ මෙහෙයුම් වඩාත් සංකීර්ණ කළ හැකි බවයි විදෙස් මාධ්‍ය වාර්තා කරන්නේ.