චීනයේ නව සයිබර් නීති ගැන තායිවානය බියෙන්

ලබන ඔක්තෝබර් මාසයේ සිට ක්‍රියාත්මක කිරීමට නියමිත චීනයේ නව සයිබර් ආරක්ෂණ සහ දේශසීමා පාලන රෙගුලාසි හේතුවෙන් තායිවාන ජාතිකයන් විශාල අවදානමකට ලක්වන බව තායිවානයේ ප්‍රධාන තීරක මණ්ඩලය වන 'මහා භූමි කටයුතු පිළිබඳ කවුන්සිලයේ' නියෝජ්‍ය අමාත්‍ය ෂෙන් යූ-චුං ප්‍රකාශ කරනවා.

තායිපේහි ජාතික තායිවාන් විශ්වවිද්‍යාලයේදී පැවැත්වුණු 'චීන සයිබර් අවකාශයේ නිරීක්‍ෂණ' පිළිබඳ සමුළුවක් අමතමින් ඔහු මේ බව සඳහන් කළා.

එක්සත් භාවය සහ ප්‍රගතිය ප්‍රවර්ධනය කිරීමේ පනත බලාත්මක කිරීමෙන් අනතුරුව, අන්තර්ජාල සේවා, දේශසීමා පාලනය සහ සයිබර් ආරක්ෂණය ආවරණය වන පරිදි නව නීති මාලාවක් හඳුන්වා දීමට චීන රජය පියවර ගෙන තිබෙනවා.

ලබන වසරේ පැවැත්වෙන චීන කොමියුනිස්ට් පක්ෂයේ 21 වැනි ජාතික සමුළුවට පෙර සිවිල් සමාජය මත පක්ෂයේ බලපෑම තවදුරටත් තද කරගැනීම මෙම හදිසි නීතිමය වෙනස්කම්වල ප්‍රධාන අරමුණ විය හැකි බවයි ෂෙන් පෙන්වා දෙන්නේ.

මෙම රෙගුලාසි මගින් නීතිය අර්ථ නිරූපණය කිරීමට සහ බලාත්මක කිරීමට පාලකයන්ට පුළුල් බලතල ලැබෙන අතර, එමගින් චීන නීති පද්ධතියේ පවතින අත්තනෝමතික ස්වභාවය තවදුරටත් ඉහළ යන බවද ඔහු පවසනවා.

විශේෂයෙන්ම, පහළ මට්ටමේ මහජන ආරක්ෂක නිලධාරීන්ට පවා මෙම නීති ක්‍රියාත්මක කිරීමට බලය පැවරීම මගින් චීනය තුළ වෙසෙන තායිවාන ජාතිකයන්ට එල්ල වන නීතිමය තර්ජනය තීව්‍ර වී තිබෙනවා.

පක්ෂයේ මතවාදයෙන් පිටතට නොයෑම සඳහා පහළ මට්ටමේ චීන නිලධාරීන් නීතිය උපරිම ලෙස තදින් ක්‍රියාත්මක කිරීමට පෙළඹෙන බවයි ෂෙන් වැඩිදුරටත් සඳහන් කරන්නේ.

චීනයේ මෙවැනි සීමා මායිම් නැති නීති බලාත්මක කිරීම් සහ මර්දනයන් නීති විරෝධී මෙන්ම නීත්‍යානුකූල නොවන ක්‍රියා ලෙස ප්‍රකාශයට පත් කරමින් ඊට එරෙහිව කටයුතු කිරීම තායිවානයේ ස්ථාවරය බවයි ෂෙන් අවධාරණය කරන්නේ.