විශ්වයේ අබිරහස් සෙවීමට නාසා හි නවතම රෝමන් දුරේක්ෂය අභ්‍යවකාශයට

විශ්වයේ අඳුරු ශක්තිය , කළු කුහර සහ අපගේ සූර්යග්‍රහ මණ්ඩලයෙන් පිටත පිහිටි ග්‍රහලෝක පිළිබඳ පුළුල් පර්යේෂණ සිදු කිරීම සඳහා ඇමරිකාවේ නාසා ආයතනය විසින් නිෂ්පාදිත මීළඟ පරම්පරාවේ ප්‍රබලතම අභ්‍යවකාශ දුරේක්ෂය වන "නැන්සි ග්‍රේස් රෝමන්" සාර්ථකව අභ්‍යවකාශයට දියත් කර තිබෙනවා.

ෆ්ලොරිඩාවේ පිහිටි කෙනඩි අභ්‍යවකාශ මධ්‍යස්ථානයෙන් ස්පේස්එක්ස් රොකට්ටුවක් ආධාරයෙන් දේශීය වේලාවෙන් ඉරිදා උදෑසන මෙම දුරේක්ෂය ගුවන්ගත කෙරුණා.

හබල් සහ ජේම්ස් වෙබ්ට වඩා 100 ගුණයක විශාල දෘශ්‍ය පරාසයක් නාසා ආයතනය සඳහන් කරන පරිදි, මෙම රෝමන් දුරේක්ෂය මගින් අභ්‍යවකාශයේ අතිවිශාල පරාසයක සන්දර්ශන දසුන් එකවර ලබා ගැනීමේ හැකියාව පවතිනවා.

එය දැනට භාවිත වන හබල් සහ ජේම්ස් වෙබ් යන ප්‍රකට අභ්‍යවකාශ දුරේක්ෂ දෙකටම වඩා 100 ගුණයක විශාල දෘශ්‍ය ක්ෂේත්‍රයක් ආවරණය කෙරෙන බවයි විදෙස් මාධ්‍ය වාර්තා කරන්නේ.

මේ පිළිබඳව අදහස් දක්වමින් නාසා ආයතනයේ නිලධාරිනියක වන නිකී ෆොක්ස් ප්‍රකාශ කළේ, රෝමන් දුරේක්ෂය මගින් අප විශ්වය දෙස බලන ආකාරය සම්පූර්ණයෙන්ම වෙනස් කරනු ඇති බවයි. "මෙම දුරේක්ෂය මගින් දස දහස් ගණනක්, සමහර විට අලුත් බාහිර ග්‍රහලෝක 100,000 ක් පමණ සොයා ගැනීමට හැකිවනු ඇතැයි අපි විශ්වාස කරනවා. නාසා හි අපගේ ප්‍රධානතම ඉලක්කයක් වන්නේ 'විශ්වයේ අප තනිවම සිටිමුද?' යන ප්‍රශ්නයට පිළිතුරු සපයා ගැනීමයි," යැයි ඇය වැඩිදුරටත් පැවසූ බවයි බීබීසි පුවත් සේවය වාර්තාකර සිටින්නේ.

එමෙන්ම නාසා හි ව්‍යාපෘති කළමනාකාරිනී ජැකී ටවුන්සෙන්ඩ් (Jackie Townsend) මාධ්‍ය හමුවේදී සඳහන් කළේ, අභ්‍යවකාශයට සිදු කළ මෙම ගමන අතිශය සාර්ථක සහ විස්මිත එකක් වූ බවයි.

ඇමරිකානු ජනාධිපතිගෙන් සුබ පැතුම්මෙම සාර්ථක දියත් කිරීමෙන් පසුව පැවැති විශේෂ මාධ්‍ය හමුවට ඇමරිකානු ජනාධිපති ඩොනල්ඩ් ට්‍රම්ප් ද දුරකථනයෙන් සම්බන්ධ වෙමින් ව්‍යාපෘතියට දායක වූ විද්‍යාඥයින්ට සහ තාක්ෂණික ශිල්පීන්ට සිය උණුසුම් සුබ පැතුම් පිරිනමා ඇති බවයි වැඩිදුරටත් වාර්තා වෙන්නේ.