අඟුලාන මුහුදු ප්රදේශයේදී ශ්රී ලංකා නාවික හමුදාවට අයත් ඩෝරා යාත්රාවක් අනතුරට පත්වීමේ සිදුවීමෙන් අතුරුදන් වූ බව කියන නාවික හමුදා නිලධාරියාගේ යැයි සැක කළ හැකි සිරුරක් හමු වී තිබෙනවා. ඒ අදාළ යාත්රාව තුළ තිබියදී බවයි වාර්තා වෙන්නේ.මෙම අනතුර පසුගිය අගෝස්තු 15 වැනිදා සිදුවුණා.
රජය විසින් පාර්ලිමේන්තුවට ඉදිරිපත් කර තිබෙන දූෂණ විරෝධී සංශෝධන පනත් කෙටුම්පත අභියෝගයට ලක් කරමින් ගොනු කර තිබූ පෙත්සම් පිළිබඳ විභාගය අවසන් කළ ශ්රේෂ්ඨාධිකරණය අදාළ පනත් කෙටුම්පතේ ව්යවස්ථානුකූල භාවය පිළිබඳ එහි රහසිගත නිගමනය පාර්ලිමේන්තුවේ කථානායකවරයාට සහ ජනාධිපතිවරයා වෙත යොමු කරන බව නිවේදනය කළා. මෙම පනත් කෙටුම්පත අභියෝගයට ලක් කරමින් පෙත්සම් 15 ක් ගොනු කර තිබූ අතර ඒවා දින දෙකක් තිස්සේ ශිරාන් ගුණරත්න, මහින්ද සමයවර්ධන සහ සම්පත් විජේරත්නගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඩුල්ල ඉදිරියේ විභාග වුණා. අද දින වාචික දේශන ඉදිරිපත් කිරිම අවසන් කළ ශ්රේෂ්ඨාධිකරණය ලිඛිත දේශන තිබේ නම් ඒවා සදූදා පස්වරු 12.00 ට පෙර ගොනු කරන ලෙස පාර්ශ්වකරුවන්ට නියම කළා.ඉන් අනතුරුව මෙම පනත් කෙටුම්පතේ ව්යවස්ථානුකූල භාවය පිළිබඳ ශ්රේෂ්ඨාධිකරණයේ රහසිගත නිගමනය පාර්ලිමේන්තුවේ කථානායකවරයා වෙත ඉදිරියේ දී යොමු කරන බවත් විනිසුරු මඩුල්ල නිවේදනය කළා. අදාල පනත් කෙටුම්පත අභියෝගයට ලක් කරමින් හිටපු අමාත්ය මහාචාර්ය ජී එල් පීරිස්, මීඩියා ලෝ ෆෝරම්, ට්රාන්ස්පේරන්සි ඉන්ටර්නැෂනල් ශ්රි ලංකා සංවිධානය ඇතුළු පාර්ශව 15 ක් විසින් පෙත්සම් ඉදිරිපත් කර තිබුණා.එම පෙත්සම් වලින් සදහන් කර තිබුණේ මෙම සංශෝධිත පනත් කෙටුම්පත තුළින් අධිකරණ බලය කප්පාදු වීම මෙන්ම මූලික මිනිස් අයිතිවාසිකම් උල්ලංගනය වීමක් සිදුවන බවයි. ඒ අනුව මෙම පනත් කෙටුම්පත ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසත් පෙත්සම්කරුවන් ඉල්ලා තිබෙනවා.
වියළි කාලගුණික තත්ත්වය හේතුවෙන් වගා හානි සිදුවූ දිස්ත්රික්ක රැසක වගා බිම් සඳහා වන්දි ගෙවීම අද (04) සිට සිදුකෙරන බව කෘෂිකර්ම හා ගොවිජන රක්ෂණ මණ්ඩලය පවසනවා. ඒ අනුව පොළොන්නරුව දිස්ත්රික්කයේ විපතට පත් ගොවීන් සඳහා අද දින රක්ෂණ වන්දි මුදල් අදාළ බැංකු ගිණුම් වෙත බැර කිරීමට කටයුතු සලසා ඇති අතර, අනෙකුත් දිස්ත්රික්කයන්හී සියලුම ගොවීන්ට මේ මස 15 වැනිදාට පෙර වගා හානි වන්දි ගෙවීමටයි කටයුතු යොදා ඇත්තේ. වියළි කාලගුණික තත්ත්වය හේතුවෙන් හම්බන්තොට, අම්පාර, පුත්තලම, අනුරාධපුරය, පොළොන්නරුව සහ මොනරාගල යන දිස්ත්රික්කවල වී, බඩ ඉරිඟු ඇතුළු අනෙකුත් වගාවන්ට හානි සිදුව තිබෙනවා. කෘෂිකාර්මික හා ගොවිජන රක්ෂණ මණ්ඩලය සදහන් කළේ, රුපියල් මිලියන 3,000ක පමණ මුදලක් මේ සඳහා වෙන් කර ඇති බවයි.
දූෂණ විරෝධී පනත් කෙටුම්පතට එරෙහිව ගොනුකර තිබූ පෙත්සම් විභාග කිරීම අද (04) ශ්රේෂ්ඨාධිකරණය හමුවේ දෙවැනි දිනටත් ආරම්භ වුණා. ශිරාන් ගුණරත්න, මහින්ද සමයවර්ධන සහ සම්පත් විජේරත්න යන විනිසුරුවරුන්ගෙන් සමන්විත ත්රිපුද්ගල ශ්රේෂ්ඨාධිකරණ විනිසුරු මඬුල්ල ඉදිරියේ මෙම පෙත්සම් විභාගය පැවැත්වෙනවා. හිටපු අමාත්ය මහාචාර්ය ජී එල් පීරිස්, මාධ්යවේදී මලින්ද සෙනෙවිරත්න, මීඩියා ලෝ ෆෝරම් ඇතුළු පාර්ශව පහළොවක් විසින් පෙත්සම් ඉදිරිපත් කර තිබෙනවා. පෙත්සම්කරුවන් කියා සිටින්නේ යෝජිත පනත් කෙටුම්පතේ අන්තර්ගත විධිවිධානවලින් මූලික මිනිස් අයිතිවාසිකම් උල්ලංඝනය වන බවයි. ඒ අනුව අදාළ පනත් කෙටුම්පත සම්මත කිරීමට අවශ්ය නම් එය ජනමත විචාරණයකින් අනුමත විය යුතු බවට තීන්දුවක් ලබාදෙන ලෙසත් පෙත්සම්කරුවන් ශ්රේෂ්ඨාධිකරණය ඉල්ලා තිබෙනවා.
ව්යවස්ථාමය ප්රජාතන්ත්රවාදය, බලතල බෙදීම, අධිකරණ ස්වාධීනත්වය සහ නීතියේ ආධිපත්යය යන මූලධර්ම මත පදනම් වූ දූරදර්ශී දැක්මක් සහිත ජාතික සංවාදයක් අවශ්ය බව විපක්ෂ නායක සජිත් ප්රේමදාස අවධාරණය කරනවා.කුමන දේශපාලන පක්ෂයක් බලයේ සිටියද ව්යවස්ථාමය ආයතන විශ්වාසනීයව සහ ස්වාධීනව ක්රියා කළ හැකි වන පරිදි එම ආයතනික ව්යුහයන් සැලසුම් කළ යුතු බවයි ඔහු සඳහන් කළේ.පොදුරාජ්ය මණ්ඩලීය නීතිඥ සංගමයේ සභාපති ස්ටීවන් තිරු සමග කොළඹ, විපක්ෂ නායක කාර්යාලයේ පැවති හමුවෙන් අනතුරුව අදහස් දක්වමින් විපක්ෂ නායකවරයා පෙන්වා දුන්නේ, ව්යවස්ථා ප්රතිසංස්කරණ වත්මන් ආණ්ඩුවේ හෝ විපක්ෂයේ දේශපාලන අවශ්යතා මත නොව, දේශපාලන බලය වෙනස් වූ අවස්ථාවක පවා ජනතාවට සහ ආයතනවලට ආරක්ෂිත මෙන්ම පිළිගත හැකි වන ආකාරයෙන් සැලසුම් කළ යුතු බවයි.ස්වාධීන ව්යවස්ථාමය ආයතනවලට බලපාන ප්රතිසංස්කරණ සඳහා ප්රමාණවත් ආරක්ෂක විධිවිධාන, පැහැදිලි සාධාරණීකරණයක්, විනිවිදභාවයක් සහ අර්ථවත් මහජන සහ පාර්ශ්වකරුවන්ගේ අදහස් විමසීමක් අවශ්ය බව ද ඔහු අවධාරණය කර තිබෙනවා.අධිකරණ ස්වාධීනත්වය, අධිකරණ කාර්යක්ෂමතාව සහ මහජන විශ්වාසය එකිනෙකට පරස්පර කරුණු නොව, එකිනෙක ශක්තිමත් කළ යුතු අංග බවද ඔහු පවසනවා.පාර්ලිමේන්තුව, විධායකය සහ අධිකරණය අතර බලතල බෙදීම, අධිකරණ ස්වාධීනත්වය, විනිවිදභාවය සහ වගවීම පිළිබඳ සාකච්ඡා කිරීමේදී පොදුරාජ්ය මණ්ඩලීය (Latimer House) මූලධර්ම වැදගත් ජාත්යන්තර මිනුම් දණ්ඩක් ලෙස භාවිත කළ හැකි බවද හමුවේදී අවධානයට ලක්ව තිබෙනවා.වර්තමාන කිසිදු අධිකරණ කටයුත්තකට බලපෑම් කිරීමකින් තොරව, දිගුකාලීන ව්යවස්ථාමය ප්රතිසංස්කරණයක් ලෙස විශේෂිත ව්යවස්ථා අධිකරණයක් හෝ වෙනත් විශේෂිත ව්යවස්ථාමය සමාලෝචන යාන්ත්රණයක් ශ්රී ලංකාවට අවශ්යද යන්න සලකා බැලිය හැකි බව විපක්ෂ නායකවරයා පෙන්වා දුන්නා. එවැනි ආයතනයක බලතල, සංයුතිය, පත්කිරීම්, ධුර කාලය, ප්රවේශය සහ දැනට පවතින ශ්රේෂ්ඨාධිකරණය හා අභියාචනාධිකරණය සමඟ ඇති සම්බන්ධතාව ඉතා ප්රවේශමෙන් සැලසුම් කළ යුතු බවද ඔහු අවධාරණය කර තිබෙනවා.මෙම හමුවේදී පාරිසරික නීතියේ ආධිපත්යය පිළිබඳව ද සාකච්ඡා කෙරුණු අතර, 2024 ජනාධිපතිවරණයේදී ඉදිරිපත් කළ Environmental Charter 2.0 හි 14 වැනි කොටස යටතේ විශේෂිත පාරිසරික අධිකරණයක් හෝ විනිශ්චය සභාවක් පිහිටුවීම සඳහා වන ප්රතිපත්තිමය කැපවීම පිළිබඳව ද ඔහු අවධානය යොමු කළා.පාරිසරික නීති ක්රියාත්මක කිරීම, පාරිසරික යුක්තිය සහ පරිසර ආරවුල් විසඳීම ශක්තිමත් කිරීම සඳහා ශ්රී ලංකාවට වඩාත් සුදුසු වන්නේ පාරිසරික අධිකරණයක්ද, විනිශ්චය සභාවක්ද, නැතහොත් එම දෙකෙහිම ලක්ෂණ සහිත ආකෘතියක්ද යන්න පිළිබඳ පොදුරාජ්ය මණ්ඩලීය රටවල අත්දැකීම් අධ්යයනය කිරීමට ඔහු කැමැත්ත පළ කර තිබෙනවා.“ව්යවස්ථා ප්රතිසංස්කරණ අඛණ්ඩ, විනිවිදභාවයෙන් යුත් සහ උපදේශනාත්මක ක්රියාවලියක් විය යුතුයි. ඕනෑම ආයතනික සැලැස්මක සැබෑ පරීක්ෂාව වන්නේ දේශපාලන බලය වෙනස් වූ විටත් එය ආරක්ෂිත සහ නීත්යානුකූලව පිළිගත හැකිද යන්නයි. අධිකරණ ස්වාධීනත්වය විනිසුරුවරුන්ගේ වරප්රසාදයක් නොව ජනතාවගේ සහ ව්යවස්ථාමය පාලන ක්රමයේ ආරක්ෂාවකි.” ව්යවස්ථාමය ප්රතිසංස්කරණ සහ පාරිසරික නීතියේ ආධිපත්යය ශක්තිමත් කිරීම ශ්රී ලංකාවේ පුළුල් ආයතනික ප්රතිසංස්කරණ න්යාය පත්රයේ කොටසක් විය යුතු බවයි විපක්ෂ නායකවරයා වැඩිදුරටත් අවධාරණය කර ඇත්තේ.
