රතු කැකුලු නැතුව දකුණේ ජනතාව තැවෙයි

දකුණු පළාතේ ජනතාව වැඩි වශයෙන් පරිභෝජනයට ගන්නා රතු කැකුලු සහල් ද වෙළදපොලේ මේ වන විට හිඟව පවතිනවා.

මේ හේතුවෙන් ගාල්ල, මාතර, හම්බන්තොට, අම්බලන්තොට, තිස්සමහාරාම ඇතුලු ප්‍රදේශ රැසක පාරිභෝගිකයින් දැඩි අපහසුතාවට පත්ව ඇති බවටයි හිරු වාර්තාකරුවන් සදහන් කළේ.

මරදගහමුල සමස්ත ලංකා සුලු හා මධ්‍ය පරිමාණ මෝල් හිමියන්ගේ සංගමයේ සභාපති බී. කේ. රංජිත් අද පැවති ප්‍රවෘත්ති සාකච්ඡාවට එක් වෙමින් ප්‍රකාශ කළේ, සුදු සහ රතු කැකුලු මෙන්ම නාඩු සහල් හිඟයද තවදුරටත් පවතින බවයි.

සහල් මෙන්ම පොල් ගෙඩියක්ද තවමත් රුපියල් 200 ඉක්මවා අලෙවි වනවා.

ඇතැම් නගරබද ප්‍රදේශවල පොල් ගෙඩිය වෙනුවට වෙළදසැල්වලින් පොල් බෑයක්ද රුපියල් 100 ඉක්මවා අලෙවි කරන බවටයි වාර්තා වන්නේ.

කෙසේ වෙතත්, වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ අද පාර්ලිමේන්තුවේදී ප්‍රකාශ කළේ, ඉදිරි දින කිහිපයේදී සතොස හරහා පොල් සහ සහල් අඩු මිලට ලබා දීමට කටයුතු කරන බවයි.