එක්සත් ජාතීන්ගේ මානව හිමිකම් ප්‍රධානියාගේ ධුර කාලය දීර්ඝ කිරීමට අනුමැතිය

එක්සත් ජාතීන්ගේ මානව හිමිකම් ප්‍රධානී වෝල්කර් ටර්ක්ගේ (Volker Turk) ධුර කාලය තවත් වසර හතරකින් දීර්ඝ කිරීමට එක්සත් ජාතීන්ගේ මහා මණ්ඩලය ඊයේ (24) පැවැති ඡන්ද විමසීමේදී වැඩිඡන්දයෙන් තීරණය කර තිබෙනවා.

ඒ, රුසියාවේ සහ ඊශ්‍රායලයේ විරෝධතාව මෙන්ම තමන් සපයන අරමුදල් සහ මැදිහත්වීම් නැවත සමාලෝචනය කරන බවට අමෙරිකා එක්සත් ජනපදය එල්ල කළ තර්ජනයද නොතකායි.

යුක්‍රේනයේ රුසියානු යුද්ධය සහ ගාසාහි ඊශ්‍රායලයේ ක්‍රියාකලාපය දැඩි ලෙස විවේචනය කළ, එමෙන්ම අමෙරිකානු ආගමන විගමන භාරයේ පසුවද්දී සිදු වූ මරණ පිළිබඳවද පරීක්ෂණ පවත්වන ලෙස ඉල්ලා සිටි ටර්ක්, ප්‍රබල බලවතුන්ට අභියෝග කිරීමට දැක්වූ කැමැත්ත හේතුවෙන් මෙම රටවල් තුනෙන්ම දැඩි විරෝධයක් එල්ල වී ඇති බවයි රොයිටර් පුවත් සේවය සඳහන් කරන්නේ.

මෙම ඡන්ද විමසීම මගින් ට්‍රම්ප් පරිපාලනය සහ එක්සත් ජාතීන්ගේ සංවිධානය අතර වර්ධනය වන ගැටුම මැනවින් ඉස්මතු වූ බවයි විදෙස් මාධ්‍ය පවසන්නේ.

වොෂින්ටනය එක්සත් ජාතීන්ගේ නියෝජිතායතන සඳහා වන අරමුදල් කපා හැර ඇති අතර, එක්සත් ජාතීන්ගේ ආයතන ගණනාවකින් ඉවත් වී තිබෙනවා.

ගෝලීය වශයෙන් ඒකාධිපති පාලනයන්ගේ බලපෑම වැඩිවෙමින් පවතින බැවින් මානව හිමිකම් තනතුර කවදාටත් වඩා තීරණාත්මක බව මානව හිමිකම් කණ්ඩායම් පවසන බවයි විදෙස් මාධ්‍ය වාර්තා කරන්නේ.

සාමාජිකයින් 193 දෙනෙකුගෙන් යුත් මහා මණ්ඩලයේ බහුතරයක් ටර්ක්ගේ ධුර කාලය 2026 අවසානය දක්වා මාස දෙකකට පමනක් දීර්ඝ කිරීමට රුසියාව ඉදිරිපත් කළ විකල්ප යෝජනාවට එරෙහිව ඡන්දය දී තිබෙනවා.

ලබන දෙසැම්බර් මාසයේදී තනතුරෙන් ඉවත් වන එක්සත් ජාතීන්ගේ මහලේකම් ඇන්ටෝනියෝ ගුටරෙස් (Antonio Guterres), ඔක්තෝබර් මාසයේදී ටර්ක්ගේ පවතින ධුර කාලය අවසන් වූ පසු ඔහු සඳහා දෙවන වසර හතරක ධුර කාලයක් යෝජනා කර ඇති බවයි මාධ්‍ය වාර්තා කරන්නේ.

ගුටරෙස්ගේ යෝජනාවට පක්ෂව රටවල් 144ක්, විරුද්ධව ඡන්ද 10ක් සහ ඡන්දය දීමෙන් වැළකී සිටීම් 13ක් ලබා දෙමින් මහා මණ්ඩලය එම යෝජනාවට සහය පළ කර තිබෙනවා.