හෝමුස් සමුද්‍රසන්ධියේ ගමනාගමනය සම්බන්ධයෙන් ඉරානය සහ ඕමානය අතර එකඟතාවක්

හෝමුස් සමුද්‍රසන්ධිය ඔස්සේ නාවික ගමනාගමනය සඳහා වන නව ගමන් මාර්ගය (Geographic coordinates) සම්බන්ධයෙන් ඉරානය සහ ඕමානය අතර අවබෝධතාවයකට පැමිණ තිබෙන බව විදෙස් මාධ්‍ය වාර්තා කරනවා.

තෙවන පාර්ශ්වයන්ගෙන් බාධාවක් සිදු නොවන්නේ නම්, මේ පිළිබඳ ඒකාබද්ධ නිවේදනය ඉදිරියේදී නිකුත් කිරීමට කටයුතු යොදා ඇති බව ඉරාන විදේශ කටයුතු අමාත්‍යාංශයේ මාධ්‍ය ප්‍රකාශක ඉස්මයිල් බගායි (Esmaeil Baghaei) ප්‍රකාශ කර ඇත්තේ.

කෙසේ වෙතත්, ඉරානය සහ ඕමානය අතර ඇති කරගන්නා මෙවැනි එකඟතාවයකින් පමණක් මෙම උපායමාර්ගික ජල මාර්ගයේ සම්පූර්ණ ආරක්ෂාව තහවුරු නොවන බවද ඔහු වැඩිදුරටත් සඳහන් කරනවා.

විදෙස් මාධ්‍ය වාර්තා කරන පරිදි, යෝජිත මෙම ගිවිසුම මගින් හෝමුස් සමුද්‍රසන්ධිය හරහා ගල්ෆ් කලාපයට ඇතුළු වන නෞකා පාලනය කිරීමේ බලය ඉරානය වෙත හිමිවීමට නියමිත අතර, මෙය ඉරානය ලැබූ විශාල ජයග්‍රහණයක් ලෙස සැලකෙනවා.

එමෙන්ම, හෝමුස් සමුද්‍රසන්ධිය නැවත විවෘත කිරීමේ ගිවිසුමකට එළඹීම ඉතා ආසන්න බවට අමෙරිකානු ජනාධිපති ඩොනල්ඩ් ට්‍රම්ප් කළ ප්‍රකාශය අදාළ ආරංචි මාර්ග විසින් තරයේ ප්‍රතික්ෂේප කර ඇති අතර, ඔවුන් පෙන්වා දෙන්නේ තවමත් අවසන් එකඟතාවකට පැමිණීමට කරුණු කිහිපයක් ඉතිරිව ඇති බවයි.

මේ අතර ඉරාන විදේශ අමාත්‍යාංශ ප්‍රකාශකවරයා සඳහන් කළේ ටෙහෙරානය සහ මස්කට් අතර පැවැත්වෙන සාකච්ඡා වෘත්තීය මට්ටමින් සාර්ථකව ඉදිරියට යමින් පවතින බවයි.