කිරින්ද පොලිස් සැරයන්වරයෙකු අතුරුදන් – දින 5කට පසු පොලිසියට පැමිණිල්ලක්

කිරින්ද පොලිස් සැරයන්වරයෙකු අතුරුදන් – දින 5කට පසු පොලිසියට පැමිණිල්ලක්

කිරින්ද පොලිස් ස්ථානයට අනුයුක්තව රාජකාරි කළ පොලිස් සැරයන්වරයෙකු අතුරුදන්ව ඇති බවට කිරින්ද පොලිස් ස්ථානයට පැමිණිල්ලක් ලැබී තිබෙනවා.

මෙලෙස අතුරුදන්ව ඇත්තේ 43 හැවිරිදි අලහකෝන් ආරච්චිලාගේ මනෝජ් ලක්මාල් අලහකෝන් නමැති පොලිස් සැරයන්වරයෙකු බවයි පොලිසිය සඳහන් කළේ.

පොලිස් තොරතුරුවලට අනුව, ඔහු තිස්සමහාරාම සහකාර පොලිස් අධිකාරී කාර්යාලයේ රාජකාරි කරමින් සිටියදී තාවකාලික ස්ථාන මාරු නියෝගයකට අනුව අගෝස්තු 20 වනදා රාජකාරියෙන් පසු තංගල්ල පොලිස් ස්ථානය වෙත ගොස් තිබෙනවා.

අගෝස්තු 21 වනදා තංගල්ල මූලස්ථාන පොලිස් ස්ථානයේ රාජකාරි කළ ඔහු පසුව යළි කිරින්ද පොලිස් ස්ථානය වෙත වාර්තා කර ඇති බව සඳහන්.

අගෝස්තු 22 වනදා උදෑසන කිරින්ද පොලිස් ස්ථානයේ පිටවීමේ සටහනක් යොදා තිස්සමහාරාම සහකාර පොලිස් අධිකාරී කාර්යාලයේ රාජකාරි සඳහා ඔහු පිටව ගොස් තිබෙනවා.

කෙසේ වෙතත්, අගෝස්තු 23 වනදා අලුයම ඔහු නිවසින් පිටව ගොස් ඇති අතර, තමන් භාවිත කළ ජංගම දුරකථනය සහ සිම්පතද නිවසේ තබා ගොස් ඇති බවට පොලිසියට ලැබුණු පැමිණිල්ලේ සඳහන් වනවා.

එතැන් සිට ඔහු පිළිබඳ කිසිදු තොරතුරක් සොයා ගැනීමට නොහැකි වී ඇති බවද පැමිණිලිකාරිය පොලිසියට ප්‍රකාශ කර තිබෙනවා.

සිද්ධිය සම්බන්ධයෙන් කිරින්ද පොලිසිය වැඩිදුර විමර්ශන ආරම්භ කර ඇති බවයි පොලිසිය සඳහන් කළේ.