නාවික හමුදාපති ඉන්දීය නිල සංචාරය නිමා කර යළි දිවයිනට

ඉන්දීය නාවික හමුදාවේ ආරාධනයකට අනුව ඉන්දියාවේ තෙදින නිල සංචාරයක නිරත වූ ශ්‍රී ලංකා නාවික හමුදාපති වයිස් අද්මිරාල් ඩේමියන් ප්‍රනාන්දු, දෙරටේ සමුද්‍රීය ආරක්ෂක සහයෝගීතාව සම්බන්ධයෙන් පැවති උපාය මාර්ගික මට්ටමේ සාකච්ඡා සඳහා සහභාගී වීමෙන් අනතුරුව අද (30) යළි දිවයිනට පැමිණ තිබේ.

නාවික හමුදාපතිවරයා නවදිල්ලි නුවර සවුත් බ්ලොක් පරිශ්‍රයේ පිහිටි ඉන්දීය නාවික හමුදා මූලස්ථානයේ සංචාරයක් සඳහා පිටත්ව ගොස් තිබුණේ ඉකුත් (27) වැනිදායි. එහිදී විදෙස් නාවික හමුදාපතිවරයෙකුට පිරිනැමෙන ඉහළම සම්ප්‍රදායානුකූල ගෞරව සහිත සම්මාන ආචාර මුරයක් ශ්‍රී ලංකා නාවික හමුදාපතිවරයාට හිමිව තිබුණා.

අනතුරුව, ඉන්දීය නාවික හමුදා ප්‍රධානී අද්මිරාල් ක්‍රිෂ්ණා ස්වාමිනාදන් හමුවී ඉන්දීය සාගර කලාපයේ ආරක්ෂාව, ද්විපාර්ශ්වික සමුද්‍රීය ආරක්ෂක සහයෝගීතාව, පුහුණු අවස්ථා සහ ධාරිතා සංවර්ධනය පිළිබඳව සාකච්ඡා කර ඇති බවයි නාවික හමුදාව සඳහන් කරන්නේ.

මෙම සංචාරය අතරතුර හමුදාපතිවරයා ඉන්දීය ආරක්ෂක මාණ්ඩලික ප්‍රධානී ජෙනරාල් එන්.එස්. රාජා සුබ්‍රමනි, ආරක්ෂක ලේකම් රාජේෂ් කුමාර් සිං සහ ඉන්දීය ගුවන් හමුදා උප ප්‍රධානී එයාර් මාර්ෂල් අසුතෝෂ් ඩික්සිත් හමුවී ඇති අතර, එහිදී ද්විපාර්ශ්වික ආරක්ෂක සහයෝගිතා සැලසුම් සහ ඒකාබද්ධ පුහුණු වැඩසටහන් කෙරෙහි විශේෂ සාකච්ඡා පවත්වා තිබු බවයි නාවික හමුදාව සඳහන් කළේ.

තවද, කේරල ප්‍රාන්තයේ කෝචි නුවර පිහිටි දකුණු නාවික විධාන මූලස්ථානයේදී, දකුණු නාවික විධානයට අණදෙන ධජ නිලධාරී වයිස් අද්මිරාල් සමීර් සක්සේනා හමුවී පුහුණු හුවමාරු වැඩසටහන් පිළිබඳව අදහස් හුවමාරු කරගත් හමුදාපතිවරයා, අවි සහ මිසයිල පිළිබඳ පාඨමාලා හැදෑරෙන 'INS Dronacharya' පුහුණු පාසල ද නිරීක්ෂණය කර තිබුණා.

මෙවැනි නිල සංචාර මඟින් දෙරට අතර ගොඩනැගෙන මිත්‍රශීලී රාජ්‍යතාන්ත්‍රික සබඳතා සහ සමුද්‍රීය ආරක්ෂක සහයෝගීතාවය හරහා ශ්‍රී ලංකා නාවික හමුදාවට ධාරිතා වර්ධනය හා පුහුණු අවස්ථා හිමිවන අතරම, එය ඉන්දීය සාගර කලාපයේ සාමය සහ ස්ථාවරත්වය අඛණ්ඩව පවත්වාගෙන යාමටද විශාල දායකත්වයක් වනු ඇති බවයි නාවික හමුදාව සඳහන් කළේ.