ලෝක ටෙස්ට් ශූරතා සටහනේ 6 වන ස්ථානය ශ්‍රී ලංකාවට – දෙවන තරගයේ සමතාවයෙන් ඉන්දියාවේ ප්‍රසාද ප්‍රතිශතය පහතට

කොළඹ එස්.එස්.සී (SSC) ක්‍රීඩාංගණයේ පැවැති දෙවන ටෙස්ට් ක්‍රිකට් තරගය ජය පරාජයෙන් තොරව අවසන් වීමත් සමඟ, 2025-27 ලෝක ටෙස්ට් ශූරතාවලියේ (WTC) ප්‍රසාද ලකුණු සටහනේ 6 වන ස්ථානයේ තවදුරටත් රැඳී සිටීමට ශ්‍රී ලංකාව සමත් වී තිබෙනවා.

මෙම තරගය ජයපරාජයෙන් තොරව අවසන් වීම හේතුවෙන් කණ්ඩායම් දෙකටම ප්‍රසාද ලකුණු 4 බැගින් හිමි වුණා.

ඒ අනුව ශ්‍රී ලංකාව තරග 6කින් ලකුණු 24ක් ලබා ගනිමින් 33.33%ක ප්‍රසාද ලකුණු ප්‍රතිශතයක් සහිතව 6 වන ස්ථානයේ පසුවෙනවා.

ගාල්ලේ පැවැති පළමු ටෙස්ට් තරගය ලකුණු 165කින් ජයගත් ඉන්දියාව තරග 2කින් සමන්විත මෙම ටෙස්ට් තරගාවලිය 1-0ක් ලෙස ජය ගැනීමට සමත් වුවද, දෙවන තරගයේ සමතාව හේතුවෙන් ඔවුන්ගේ ප්‍රසාද ලකුණු ප්‍රතිශතය 53.33% සිට 51.52% දක්වා පහත වැටී තිබෙනවා.

ඒ අනුව ඉන්දියාව තරග 11කින් ලකුණු 68ක් ලබා ගනිමින් සටහනේ 5 වන ස්ථානයේ තවදුරටත් රැඳී සිටිනවා.

පළමු ඉනිමේදී ලකුණු 213ක පරතරයක් සහිතව පසුපසින් සිටිමින් දෙවන ඉනිම (Follow-on) ආරම්භ කළ ශ්‍රී ලංකා කණ්ඩායම, අවසන් දිනයේදී දැක්වූ විශිෂ්ට සටන්කාමී පිතිහරඹය හේතුවෙන් ඉන්දීය ජයග්‍රාහී බලාපොරොත්තු සුන් කිරීමට සමත් වූ අතර, . පළමු ඉනිමේදී ලකුණු 103ක් ලබාගත් සොනාල් දිනුෂ, දෙවන ඉනිමේදී ද පන්දු 264කට මුහුණ දෙමින් නොදැවී ලකුණු 133ක් රැස් කරමින් ශ්‍රී ලංකා ඉනිම කඩුලු 9ක් දැවී ලකුණු 429ක් දක්වා ඉහළට ගෙන ආවා.

ලෝක ටෙස්ට් ශූරතාවලියේ නවතම ප්‍රසාද ලකුණු සටහන මෙසේයි,

ඔස්ට්‍රේලියාව – 80.00%

දකුණු අප්‍රිකාව – 75.00%

නවසීලන්තය – 72.22%

බංග්ලාදේශය – 55.56%

ඉන්දියාව – 51.52%

ශ්‍රී ලංකාව – 33.33%

එංගලන්තය – 29.76%

බටහිර ඉන්දීය කොදෙව් – 20.83%

පාකිස්ථානය – 19.05%