22 වන ව්‍යවස්ථා සංශෝධනය අධිකරණයේ ස්වාධීනත්වයට දැඩි පහරක් – NPP විධායක කමිටු සාමාජික නීතිඥ ලාල් විජේනායකගෙන් පෙත්සමක්

විනිසුරුවරුන්ගේ විශ්‍රාමික වයස දීර්ඝ කිරීම සඳහා වන 22 වන ආණ්ඩුක්‍රම ව්‍යවස්ථා සංශෝධන පනත් කෙටුම්පත හදිසියේ පාර්ලිමේන්තුවට ඉදිරිපත් කර සම්මත කර ගැනීමට දැරූ උත්සාහය තුළින් රට තුළ මහත් අර්බුදකාරී තත්ත්වයක් මතු කර ඇති බව ප්‍රජාතන්ත්‍රවාදය සඳහා වූ නීතිඥයෝ සංවිධානයේ කැඳවුම්කරු, ජාතික ජන බලවේගයේ නායකත්ව මණ්ඩල සභික, අධිනීතිඥ ලාල් විජේනායක පවසනවා.

අදාළ පනත් කෙටුම්පතේ ව්‍යවස්ථානුකූලභාවය අභියෝගයට ලක් කරමින් ඔහු ඇතුළු පාර්ශ්ව කිහිපයක්ම ශ්‍රේෂ්ඨාධිකරණය හමුවේ පෙත්සම් ගොනු කර ඇති අතර, මෙම සංශෝධනය සම්මත කිරීමට නම් ජනමත විචාරණයකින් ජනතාවගේ අනුමැතිය ලබා ගැනීම අනිවාර්ය බවට තීන්දුවක් ලබා දෙන ලෙසයි පෙත්සම්කරුවෝ ශ්‍රේෂ්ඨාධිකරණයෙන් ඉල්ලා සිටින්නේ.

විශේෂ නිවේදනයක් නිකුත් කරමින් අධිනීතිඥ ලාල් විජේනායක පෙන්වා දෙන්නේ, විනිසුරුවරුන්ගේ සේවා කාලය තුළදී ඔවුන්ගේ විශ්‍රාමික වයස ඇතුළු වරප්‍රසාද වෙනස් නොකළ යුතුය යන්න අධිකරණයේ ස්වාධීනත්වය ආරක්ෂා කෙරෙන ප්‍රධාන මූලධර්මයක් බවයි.

මෙම මූලධර්මය කඩ කිරීම ප්‍රජාතාන්ත්‍රවාදයට, මූලික අයිතිවාසිකම්වලට මෙන්ම මානව හිමිකම්වලට එල්ල වන දැඩි පහරක් බවද ඔහු අවධාරණය කරනවා.

විධායකයේ සහ ව්‍යවස්ථාදායකයේ බලපෑම්වලින් ජනතාවගේ අයිතිවාසිකම් ආරක්ෂා කර දිය හැකි එකම ස්වාධීන ආයතනය අධිකරණය බවත්, අධිකරණයේ ස්වාධීනත්වය යනු ජනතාවට දෙන ලද පරිත්‍යාගයක් නොව දීර්ඝ කාලීන සටනකින් දිනාගත් අයිතිවාසිකමක් බවත් අදාළ නිවේදනයේ සඳහන්.

නඩු විමසීම කඩිනම් කිරීමට මෙම පියවර ගත් බව ප්‍රකාශ කිරීම මුසාවක් බව පෙන්වා දෙන ඔහු, එමගින් අධිකරණයේ ස්වාධීන කාර්යභාරය ඇහිරී යන බව ද කියා සිටිනවා.

මෙම 22 වන සංශෝධනයට එරෙහි සටන හුදෙක් ආණ්ඩුව සහ විපක්ෂය අතර පවතින දේශපාලන සටනක් ලෙස හුදකලා කිරීම ජනතාව නොමඟ යැවීමක් බව පෙන්වා දෙන නීතිඥ ලාල් විජේනායක, ජනතාව හමුවේ ඇති සැබෑ විකල්පය වන්නේ දේශපාලන පක්ෂයක් ආරක්ෂා කිරීම නොව, අනාගත පරම්පරාව වෙනුවෙන් ශිෂ්ට සම්පන්න සමාජයක ජීවත් වීමේ අයිතිය ආරක්ෂා කර දීම බව වැඩිදුරටත් අවධාරණය කරනවා.